Մարտի 13-ին քաղբանտարկյալ Գագիկ Ջհանգիրյանի հերթական դատական նիստի ավարտին, այն բանից հետո, երբ նա հայտարարել է, որ իր ճառը տարբերվելու է պաշտպանների խոսքից և լինելու է ինքնատիպ, նրան ապօրինաբար, խախտելով վարույթն իրականացնող մարմնի որոշումը, ոստիկանության կողմից ըստ էության առևանգվել և Վարդաշեն ՔԿ հիմնարկի փոխարեն տարվել է Ազգային անվտանգության ծառայության մեկուսարան:

Հայ ազգային կոնգրեսը չի բացառում, որ Ջհանգիրյանի հայտարարությանը հետևած այս գործողությունը կապված է այն հանգամանքի հետ, որ նա, որպես դատախազ, տևական ժամանակ վարել է հոկտեմբերի 27-ի գործը: «Մենք համարում ենք, որ վտանգված է Գագիկ Ջհանգիրյանի կյանքը, պահանջում ենք նրան անհապաղ վերադարձնել Վարդաշեն ՔԿՀ և պաշտոնական բացատրություն տալ կատարված ապօրինության վերաբերյալ», - ասվում է ՀԱԿ հայտարարության մեջ: